Amañ emañ ar CD-ROM !
Dastumadenn veziantoù evit Windows
Setu evit ar wech kentañ un dastumadenn veziantoù e brezhoneg evit an holl.
Kavet e vo war ar cd-rom-mañ ar meziantoù brudetañ eus bed ar meziantoù digor o zarzh. Digoust ha galloudus int ha ganto e c'haller labourat e brezhoneg gant efedusted war un urzhiataer. Aes int da staliañ ha da implijout evel-just ! C’hoarioù diduellus evit ar vugale a zeu da glokaat an dastumenn-mañ ivez, evit plijadur an holl implijourien.
Savet gant ur skipailhig troerien ha stlennegerien a-youl vat ez eus bet tennet 1000 skouerenn eus ar cd-rom-mañ, evit ar skolioù brezhonek da gentañ-penn hag evit an holl war-lerc'h. Digoust eo ar cd-rom-mañ ha n'hall ket bezañ gwerzhet e mod ebet.
Deuit e darempred ganeomp evit reiñ hoc'h ali, evit bezañ sikouret pe evit hor skoazellañ memes tra !
Trugarez a-greiz kalon !
Skipailh An Drouizig
http://www.drouizig.org
drouizig@drouizig.org
PDFoù ar c'holoenn hag ar bladenn-arc'hant.
(Gant Ofis ar Brezhoneg) Meziantoù e brezhoneg : binvioù talvoudus ha digoust evit an holl !
Ur CD-rom kenembannet gant ar gevredigezh Korvigelloù an Drouizig hag Ofis ar Brezhoneg a zo o paouez dont er-maez.
War ar CD-rom-mañ e kaver meziantoù “dieub a wirioù” lakaet e brezhoneg gant skipailh kevredigezh Korvigelloù an Drouizig gant skoazell termenadurourien hag adlennerien an Ofis.
Pal ar bladenn-mañ eo reiñ an tu d’an dud da implijout ar muiañ ar gwellañ ar brezhoneg en o endro labour pe en o buhez dudi.
Rak ma kaver war ar bladenn-arc’hant-mañ meziantoù talvoudus-bras evel OpenOffice (skridtreterez, taolenner), Mozilla Firefox (merdeer) Mozilla Thunderbird (posteler) e kaver ivez ur bern c’hoarioù a blijo d’ar re vras ha d’ar re vihan : Sebran, Gwezboell, Yams, echedoù, Awele, Abalon hag all. Embannet ez eus bet 1000 skouerenn eus ar bladennig-mañ. Ul lodenn vat a zo bet skignet dija gant ar gelaouenn Bremañ d’he c’houmananterien. Tost peurwerzhet eo bremañ met arabat bezañ nec’het : war lec’hienn an Drouizig http://www.drouizig.org e c’hellot pellgargañ an holl veziantoù meneget uheloc’h.
Meziantoù e brezhoneg
(dastumadenn gentañ, miz Kerzu 2005)- OpenOffice.org 2.0.1
- Mozilla Firefox 1.5
- Mozilla Thunderbird 1.5
- An Drouizig Difazier 2.5
- AbiWord Processor 2.2.9
- eMule 0.46e
- FileZilla 2.2.17
- ... ha meur a c’hoari evit ar vugale
(Sebran,PacMan, Gwezboell, Yams, Echedoù, Awele, Abalon, Damoù, BackGammon, Tangram, Linéo, MasterMind... ).
Penaos loc'hañ ar CD-ROM ?
- Lakait ar cd-rom el lenner.
- Kit er prenestr "Poste de travail" pe "My Computer" evit ur Windows saoznek.
- Grit ur c'hlik dehou war lizherenn ar cd-rom.
- Klikit war 'Explore(r)'.
Resevit ho CD-ROM...
Digoust eo ar cdrom, padal eo dav paeañ 5€ evit ar mizoù-kas (kas boutin dre an Ti-Post). Kasit ho lizher/chekenn da :
Kevredigezh Korvigelloù an Drouizig
7 rue de la Brise/straed an Aezhenn
Appt B-14
56000 Vannes/Gwened