Brezhoneg 
Français 
English (UK) Prezegenn An Drouizig e Kemper
- Détails
Devezhioù 2010 e Penn ar Bed a-zivout ar meziantoù digor e Kemper
Kinniget he doa kevredigezh Korvigelloù an Drouizig he labourioù e-kerzh Journées Finistériennes du Libre 2010 gant ur brezegenn digoust
Prezegenn An Drouizig er Mission Bretonne
- Détails
Kinniget he doa kevredigezh Korvigelloù an Drouizig he labourioù gant ur brezegenn digoust er Mission Bretonne e Pariz.
Al lec'h Mission Bretonne / Ti ar Brezhoneg, d'ar sadorn 18 a viz Meurz 2011 da 17 e.
Kinniget hon doa labourioù kevredigezh Korvigelloù an Drouizig : an Difazier, an troidigezhioù meziantoù...
War-lerc'h ar c'hinnig e krogas kendivizoù (birvidik a-walc'h, plijus avat).
Ar ginnigadenn a c'hell bezañ pellgarget amañ.
Trugarez vras d'ar Mission Bretonne / Ti ar Brezhoneg ha d'ar re a oa deuet !
Scribus 1.4.x e brezhoneg
- Détails
Ur meziant pajennaozañ ameilet dre urzhiataer (PAU) eo Scribus. Dasparzhet eo dre lañvaz GPL ha disgoust eo. Handelvoù evit Linux, Unix, Mac OS X pe Windows zo hegerz bremañ. Arc'hwelioù liesseurt uhel o live zo da Scribus, evel re a gaver gant meziantoù kenwerzhel all.
Ijinet eo bet Scribus evit ar pajennaozañ azasaus hag evit prientiñ teulioù o ferzhed vicherel. Krouet e vez gantañ kinnigadennoù ha furmskridoù PDF fiñv hag etrewezhiat. Kelaouennoù, kraflevrioù, skritelloù ha levrioù a vez savet gant Scribus.
Skoret eo gant Scribus an darn vuiañ eus ar mentrezhioù kevregat pouezusañ mui an SVG (Scalable Vector Graphics : Kevregadoù Sturiadel Skeulaus). En o zouez ez eus al livioù SMMD hag ardoadur al livioù ICC (Integrated Communications Controller : Reolerezhioù Kehentiñ Enframmet). Arveret e vez e muioc'h eget 24 yezh, ar brezhoneg en o zouez abaoe an handelv 1.3.4.
Gannet eo, gant PDF, an treuzweluster, ar rinegañ hag ur spletad ledan eus erspizadurioù evit PDF 1.4 evel PDF/X3, o gannañ maeziennoù furmskridoù PDF etrewezhiat, notennadurioù ha sinedoù.
Savet eo diwar XML, e vo enporzhiet testennoù diouzh restroù o mentrezh OpenDocument pe restroù RTF, Microsoft Word .doc, ha HTML ken mat all.
Traoù nevez gant Scribus 1.4.x
Gwellaet eo bet dornata an ergorennoù evel an ostilhoù da dreuzfurmiñ, ar Scrapbook hag ardoer ar skeudennoù.
Evit an testennoù hag al lizherennerezh ez eus bet ouzhpenn kalz dibarzhioù, evel stil an arouezennoù, marzioù gwel hag askouezh an arouezioù. Adober/Dizober a zo hegerz evit an darn vuiañ eus ar gwezhioù a dizh an testennoù.
Gwellaet eo bet lec'hiadur ha dilec'hiadurioù ar reti, herrekaet eo bet pajennaozañ ar sterniadoù war ar steuenn hag etrewezhiañ etre ar sterniadoù kenereet.
Keweriusterioù nezvez zo bet ouzhpennet evit an ergorennoù sturiadel evel gwezhiadurioù mod bolead, efedoù sturiadel pe embanner stiloù al linennoù.
Gwellaet eo bet dornata al leuniañ evel ar gousturioù leuniañ, rizhioù ilrezennoù ouzhpenn, skor evit mentrezhioù al livaouegoù (AI, EPS, GPL, PostScript, SOC) ha kalz livaouegoù all.
Siloù da enporzhiañ ar sturiadelloù : Siloù nevez da enporzhiañ a zeu gant Scribus 1.4.x : Adobe Illustrator (EPS ha restroù diazezet war PDF), Macintosh Picture (PICT), Windows Metafile (WMF), Xfig (FIG), Calamus Vector Graphics (CVG), Kivio Stencils (SML), ha DIA Shapes (SHAPE).
Gwellaet eo bet dornata ar restroù savet gant Photoshop (adoet e vez an treuzfollennoù mod PSD, da skouer). Adskrivet eo bet Ardoer ar Skeudennoù.
A-fet keweriusterioù evit ar Gwask e kaver ar merkoù moullañ ha diskouez goloadur an huz dre Arlberz ar moullañ.
Gwellaet bras eo bet ezporzhiañ ar restroù mod PDF. Bremañ e vez ezporzhiet e mod PDF 1.5 gant treuzfollennoù. Enkorfadur pe erlec'hiadur an elfennoù zo bet gwellaet ivez.
Ouzhpennet ez eus bet kant ha kant gwelladenn bras pe vrasoc'h.
Hizivaet eo bet ar skriptoù enkorfet.
Kalz muioc'h a batromoù zo bet enlakaet e Scribus 1.4.x.
Adskrivet ha hizivaet eo bet reizhiad ar skoazell.
Embannet ez bet ul levr e brezhoneg nevez zo, savet gant Scribus penn da benn (golo ha korf an destenn) :
Steredenn, ur c'hoari-video e brezhoneg
- Détails
Aet eo war-wel ar c'hoari Steredenn d'ar c'hentañ a viz Here gant Pixelnest Studio
Steredenn a zo ur c'hoari-video bet diorroet gant ar studio dizalc'h roazhonat Pixlenest.
Ur Shoot Them Up eo ar c'hoari, da lâret eo ur c'hoari lec'h ma vez dilec'hiet ul lestr-egor ha tennet war listri enebourien all evit trec'hiñ al liveoù, pep live oc'h echuiñ gant un enebour meur, galloudusoc'h evit ar re all. Perzh ar c'hoari a zo ar meskaj gant an doare c'hoari anvet rogue-like. Bewech ma vez c'hoariet eo savet al liveoù en un doare dargouezhek ha disheñvel eo pep c'hoariadenn e-keñver an enebourien, an armoù hag ar gwellaennoù dastumet. Ma vez kollet avat, eo ret adkregiñ pep tra adalek ar penn-kentañ.
Kement se a lak ar c'hoari da vezañ diaes a-walc'h, met plijus bepred rak eo disheñvel pep prantad c'hoari.
Un neuz mod-kozh a zo gant Steredenn, a lak da soñjal er c'hoarioù a veze kavet war al letrinoù-c'hoari kozh evel ar Super Nintendo, met gant efedoù a-vremañ ha lusket gant ur sonerezh rock eus ar re wellañ.
Estreget an doare c'hoari ordinal, lec'h m'eo ret trec'hiñ un hollad a liveoù a-raok an emgann dibenn a-enep an enebour meur e vez kavet tri doare c'hoari all:
Ar c'hoariadenn bemdeziek a zo un hollad liveoù a zo ar memes re evit an holl c'hoarierien e-pad un devezh. Ur chañs hepken en deus pep c'hoarier evit echuiñ al liveoù, ha keñveriet e vez ar poentoù etre an holl perzhidi.
An Arena, lec'h ma vez tu d'en em gannañ a-enep enebourien veur bet kejet er mod ordinal, gant an armoù bet dibabet en a-raok.
An dreistc'hoari, lec'h ma vez laosket a-gostez an tu dargouezhek. Aze e vo bepred an hevelep armoù, enebourien ha gwellaennoù a vo kavet. Savet eo ar mod-mañ evit kenstrivañ a-enep mignoned gant ar memes live. Ret eo echuiñ ar c'hoari ur wech evit dibrennañ ar mod-mañ.
Pixelnest a zo ur studio c'hoarioù-video dizalc'h savet gant daou zen : Damien Mayance ha Matthieu Oger. Diorroet eo bet ar c'hoari ganto, ha skoazellet int bet gant Simon Coroller evit an tresadennoù, Etienne Marque evit ar sonioù ha Zander Noriega evit ar sonerezh.
Gwerzhet e vez ar sonerezh war bandcamp.
Gallout a reer prennañ ar c'hoari war Steam pe itch.io evit 12,99€. War an urzhiataerioù gant Windows, Mac pe Linux ez a en-dro. War Xbox One eo raktreset dont er-maez ivez.
Un distaol 15% a zo evit an ermaeziadenn, 11.04€ eo ar c'hoari evit ur pennadig. Evit e lakaat e Brezhoneg eo ret mont da gemmañ er yezh en arventennoù. Sed amañ ur c'helennskrid a zispleg penaos ober.
SuperTux e brezhoneg
- Détails
Aet eo war-wel SuperTux 0.4 d'an 20 a viz Kerzu. Evit ar wech kentañ e vez kavet e brezhoneg.
Pellgargañ Supertux war-eeun : Windows pe Mac
SuperTux a zo ur c'hoari savennoù heñvel diouzh ar c'hoari milvrudet Super Mario Bros, deuet e-maez war al letrinoù-c'hoari NES er bloavezhioù 80. An hevelep mennozh ha SuperTuxKart an hini eo : adkemer ur stirad c'hoarioù brudet evit sevel ur c'hoari dindan ul lañvaz frank.
Tizhout dibenn un hollad a liveoù eo pal ar c'hoari, en ul lammat dreist an harzoù hag an enebourien. Un toullad elfennoù a zo adkemeret war-eeun eus Super Mario : ar vi, a lako Tux da greskiñ, evel kabell-touseg Mario, pe ar vleunienn dan, da skouer.
Daou ved disheñvel a gaver, gant un toullad liveoù e pep hini. Unan a dremen en Antarktika, hag unan er c'hoad. Liveoù savet gant ar c'hoarierien ha rannet dre ar genrouedad a vez kavet ivez.
SuperTux a zo dindan al lañvaz GNU GPL ha gallout a reer c'hoari war Windows, Mac pe GNU/Linux.
Evit pellgargañ Supertux war GNU/Linux, arverit hoc'h ardoer pakadoù.
Page 13 sur 17