Evezhiadennoù yezh...

Evit kaozeal diwar-benn troidigezh Mozilla Firefox ha Mozilla Thunderbird e brezhoneg
Avatar de l’utilisateur
drouizig
Site Admin
Messages : 484
Inscription : mar. nov. 16, 2004 11:45 am
Localisation : Gwened/Sant-Brieg/Pouldreuzig
Contact :

Evezhiadennoù yezh...

Message par drouizig »

A-berzh Fulup J.:
Salud dit, pellgarget em eus doare nevez Firefox er mintin-mañ ha setu
ur frazenn da eeunaat da'm soñj :

"Enlugelladoù ouzhpenn zo azgoulennet evit gwereañ an holl vediaoù
arveret gant ar bajennad-mañ".

Gwechall eo molladoù a zeue (e-lec'h enlugelladoù) hag un tamm mat
sklaeroc'h e oa. Ganeomp eo bet degemeret an termen adveziant evit
plug-in a gavan-me splann. Lugañ a dalvez dija sankañ e-barzh, n'eo ket
dav mont da ijinañ "enlugañ/enlugellañ". Azgoulenn a dalvez kement ha
goulenn ha goulenn dizehan (evel azpediñ). Ne zegouezh ket tamm ebet
amañ. Arverañ ne zegas netra e-keñver implijout zo un termen brezhonek
anavezet gant an holl abaoe kantvedoù hag en holl c'heriadurioù e
peurunvan. Perak kaout c'hoant en em zizober eus Implijout ? Evit
"pajennad", evel am eus bet tro da lavaret meur a wech eo pounner ha
faziek an implij eus -ad a rit aze. Pajenn zo mat-tre amañ. An hevelep
fazi a gaver a-hed troidigezh Google.

Kinnig a ran : Ret eo deoc'h pellgargañ adveziantoù all evit ma yafe
en-dro an holl vediaoù implijet gant ar bajenn-mañ

Fulup
Avatar de l’utilisateur
drouizig
Site Admin
Messages : 484
Inscription : mar. nov. 16, 2004 11:45 am
Localisation : Gwened/Sant-Brieg/Pouldreuzig
Contact :

Message par drouizig »

Traouigoù all :

Pouezhit war War-lerc'h a-benn staliañ an enlugelladoù-mañ : Pouezit hep h

Enlugelladoù da bellgargañ hegerz : Enlugelladoù hegerz da bellgargañ

(ni a ra gant adveziantoù evit Plug In, degemeret e 1998 e-ser al labour
evit troidigezh KDE, gant Servij ar Brezhoneg ha Jañ-Mai Drapier)

A-benn staliañ Macromedia Flash Player eo ret deoc'h bezañ a-du gant ar
pezh a heul : (sevel a-du, zo bravoc'h)... gant ar pezh a heuilh

A-du on : a-du emaon (ur savpoent eo, n'eo ket ur perzh, ret eo
implijout "emañ". Ur gallekadur eo a-du on/n'on ket a-du)

N'on ket a-du : N'emaon ket a-du

Ardeiñ ar sinedoù : Urzhiañ/merañ ar sinedoù

Ardoer ar Sinedoù : Merer ar sinedoù, Renkell ar sinedoù

Divrezhonek eo an troiennoù 4 a zeizioù zo, 5 a zeizioù zo, 6 a zeizioù
zo, koshoc'h eget 6 a zeizioù : 4 deiz zo, 5 deiz zo, 6 deiz zo,
koshoc'h eget 6 deiz zo

Enankit un anv evit ar varrenn-se : Skrivit/Lakait/Merkit un anv evit ar
varrenn-se

Stlejañ an ergorenn war pe diwar ar barrennoù ostilhoù a-us evit
ouzhpennañ pe dilemel anezhi : Dibabit lodennoù ar barrennoù ostilhoù a
fell deoc'h ouzhpennañ pe lemel kuit (dre riklañ-sachañ ho logodenn warno).

Ne lenner ket ul lodenn eus ar prenestr "Personelaat ar varrenn
ostilhoù" : "Assav ar splet...."

Stil ar bajennad : Stil ar bajenn

Stil pajennad eeunn : Stil pajenn eeun

Kirilek : Kirillek (alies skrivet gant un "l", a-wechoù mat gant daou)

Kornog : Kornôg (da reizhañ e pep lec'h)

Unikod : Unicode ? Anv ur standard eo n'eo ket ? Ne vez ket troet er
yezhoù all. Marteze eo furoc'h leuskel Unicode en e stumm orin.

Reter Krenn : Reter-kreiz (moyen orient zo Reter-kreiz; s.o. Geriadur an
Here, pennad reter; morse n'em boa gwelet "Reter krenn" betek hiziv).

Europat ar Reter, Europat ar c'hornôg, Europat ar su, Europat ar C'hreiz
: Souezhus a-walc'h. Europa ar Reter, Europa ar C'hornôg, Europa ar Su
zo kenkoulz. Me a lakafe, zoken, Kornôg Europa, Reter Europa, Su Europa,
Kreiz Europa (berroc'h, efedusoc'h)

Romaneg : Roumaneg (arabat kemmeskañ yezh Roumania gant yezh ar Rromed)

Petra eo nordeg ? : Norvegeg ?

Klask er bajennad-mañ : Klask er bajenn-mañ

Enrollañ ar bajennad dindan : Enrollañ ar bajenn dindan

En alberzh moullañ, lakaat pajenn e-lec'h pajennad; evit "maezioù" e
reomp-ni gant "gweledva"

Er prenestr Skoazeller enporzhiañ :
Toupinerioù : Petra eo ? Toupinoù ?;
Ma re well ganin : Ma sinedoù

Biziatait ur chomlec'h lec'hienn.... : skrivit chomlec'h ul lec'hienn...

Paouez kargañ ar bajennad-mañ : Paouez kargañ ar bajenn-mañ

Adkargañ ar bajennad war arver : Adkargañ ar bajenn red

Mont betek ur bajennad war lerc'h : Mont d'ar bajenn war-lerc'h (pe,
berroc'h, Pajenn war-lerc'h)

Mont betek ur bajennad kent : Distreiñ d'ar bajenn kent (pe, berroc'h,
Pajenn kent)

Gwereañ : Sklaeroc'h a-galz e oa Aozañ er roll lañserioù

Fulup
Giulia
Messages : 66
Inscription : sam. août 20, 2005 3:26 pm
Localisation : Aubervilliers, 'kichen Pariz
Contact :

Message par Giulia »

Salud deoc'h! A-du mat on gant an evezhiadennoù-man, ouzhpenn-se e klotfe gwelloc'h gant an droidigezhioù a vo da zont evit meziantoù all. Ober a reomp ni (evit Ubuntu), asamblez gant troourien Kde, gant gerioù simploc'h (aozan/kinnig evit View, hag all...). D'am sonj e vo aesoc'h evit an dud da gompren.

Digarezit evit an ~-où a vank em c'hemennadennoù, ur gudenn douchennaoueg a zo ganin ;)
Avatar de l’utilisateur
drouizig
Site Admin
Messages : 484
Inscription : mar. nov. 16, 2004 11:45 am
Localisation : Gwened/Sant-Brieg/Pouldreuzig
Contact :

Message par drouizig »

Gant Alan:
Traoù zo o tont eus an troour all ne 'm eus ket reizhet. Ma gwall eo memes tra.

Pajennad : ne evan ket ur voutailh met ur voutailhad. Ur pouez zo gant ar pajennadoù zoken.

4 a zeizioù zo : Fin eo Fulup J. (piv eo hennezh) n'en deus ket kroget gant 2 zeiz zo. Ra laro-eñ penaos c'hoari gant ar c'hemmadur.

Evit anvioù ar yezhoù, ne 'm eus ket sellet se a-dost. Lakaet em boa em soñj e oa bet gwelet se gant an ofis endeo.

Mollad zo MODULE.

Savet eo bet enlugellad diwar plug-in. To plug a dalv sankañ ivez, pe ur fazi a ran ?

adveziant : logiciel auxiliaire, pezh n'eo ket faos.
Abaoe ur bloaz e ran gant enlugellad. Emañ war roll ar gerioù er restrad Excel implijet ganimp evit treiñ OOO.

implijad : employé (en ur stal)
implijour : employeur (an hini a bae an implijad)
implijout : employer

« a-du on » 'm eus lennet war Yezhadur bras ar brezhoneg savet gant Kervella !

Adkargañ ar bajennad war arver : Adkargañ ar bajenn red Sañset ne oant ket a-du gant "red". Cheñch a reont o mennozh evel ma ra an avel...

Gwereañ : Sklaeroc'h a-galz e oa Aozañ er roll lañserioù
Aozañ zo organiser, n'eo ket diskouez !

Kemmeskañ a ra gant embann moarvat. Ma geriadurioù saozneg evit ar stlennet a lavar : edit : éditer. Neuze em eus heuliet.
Giulia
Messages : 66
Inscription : sam. août 20, 2005 3:26 pm
Localisation : Aubervilliers, 'kichen Pariz
Contact :

Message par Giulia »

Salud deoc'h!
Evit ar gerioù implijet: a-du on eo simploc'h ober gant adveziant eget enlugellant, deoc'h da welet da c'houde. Ret eo, d'am soñj, klask implij ar gerioù a vo ar fraesañ evit an implijerien.

Evit troidigezh Ubuntu, hon eus dibabet ober gant ar gerioù da heul (ne lâran ket eo ar re welañ, lakaat a ran anezho amañ evit gellout keñveriañ):
-plugin: adveziant
-view: aozañ/pe c'hoazh kinnig (d'am soñj e rimp gant "kinnig" kentoc'h eget aozañ)
Hag evit ar gerioù all evel "gwereañ", ardeiñ hag all, d'am soñj int re arbennik evit bezañ implijet amañ, padal e vez komprenet diouzhtu petra eo aozañ/kinnig, merañ, hag all...
D'am soñj din-me eo arabat klask bezañ re dost eus ar c'heriaoueg saoznek orin, rak ar pal n'eo ket treiñ, met azasaat, ha kinnig ur "produ" troet brav met a chom aes da implij. Ma vez implijet re a c'herioù nevez, e vo digalonekaet buan an dud, hag e vo adkemeret ar meziant e galleg, peogwir e vo aesoc'h. Ne lâran ket eo ret simplaat betek paouraat ar c'heriaoueg, ret eo kaout ur c'hempouezh etre an daou. Dreist holl pa vez frazennoù displegañ evit dibaboù 'zo, eo gwelloc'h chom hep implij daou pe tri ger arbennik, pe ne vo komprenet nag ar ger, nag an displegadenn.
Ma mennozh din-me eo.
N'on ket amañ evit pismigañ, din-me n'eus diforc'h ebet etre "a-du on" pe "a-du 'maon", kompren a ran an daou, klevout a ran "a-du on", ha ma lârit emañ e-barzh geriadur bras ar brezhoneg, eo mat din. Traouachoù a seurt-se ne zedennont ket ac'hanon (nemet e vefe fazioù e gwirionez). Memestr evit pajenn pe pajennad, aze e kav din emañ ar wirionez ganeoc'h kentoc'h, met se 'zo traoù bihan, d'an droour da zibab.

Padal, evit ar peurrest, e kav din eo ret deomp en em c'houlenn: evit piv e reomp al labour-se? ha perak?
Respont a rin evit an droidigezh a ran eus Ubuntu:
-Treiñ a ran evidon da gentañ, met ivez gant ar spi e vo implijet gant ar muiañ a dud posubl, er skolioù, en tiegezhioù, ha me oar-me. Met evit se eo ret ober gant gerioù anavezet gant an holl. Un urzhiataer a zo un ostilh evit sevel traoù all, ha ma vez kemeret muioc'h a amzer da glask kompren anvioù ar meuziadoù eget klask kas da benn ar pezh hon eus d'ober, neuze n'eo ket bet tizhet pal an droidigezh. Setu perak e klaskan ober gant gerioù simpl ha fraes, evit ma vo komprenet an aesañ posubl, zoken gant tud n'int ket boas da implij urzhiataerezioù.


Setu! Spi m'eus e vo simplaet un tamm mat ho troidigezhioù ganeoc'h. Rak d'am soñj e vo kalz muioc'h a dud prest d'ober gant meziantoù e brezhoneg da c'houde :wink:

Kalon deoc'h da genderc'hel!
Giulia
Avatar de l’utilisateur
drouizig
Site Admin
Messages : 484
Inscription : mar. nov. 16, 2004 11:45 am
Localisation : Gwened/Sant-Brieg/Pouldreuzig
Contact :

Message par drouizig »

Alan & Co,

- Evit lavar ar wirionezh e kavan-me ivez didalvoud a-walc'h ober gant "Ardeiñ" ha "Gwereañ". Gwelloc'h eo ganin chom gant "Merañ" ha "Gwelout". Ganto e raen a-raok, hag adlakaet em eus anezho gant troidigezh Firefox 1.5.0.3. Ar gerioù kinniget el lañser pennañ a rank bezañ sklaer evit pep unan.
- Arverañ, Arveriad : a-du on ober ganto e-lec'h implijour(-ien). Koulskoude ne soñjan ket me eo un arguzenn ma vefe div ster evit ur ger hepken: heñvelsterioù zo e pep yezh.
- N'on ket a-enep ober gant Enlugellad kennebeut ("Lugant" a vefe gwelloc'h zoken eus ma zu...).
- Diwar-benn « Pajennad » e-lec'h « Pajenn »... meur a wech em eus resevet evezhiadennoù a-berzh a-bep seurt tud... War ar seblant e vefe ur fazi yezh strik ober gant « Pajennad ». N'em eus ket cheñchet implij ar ger-se koulskoude, da genderc'hel neuze...
- Trugarez d'an holl evit ar vuioù-koukoug.

- Ouzphenn 1000 gwech eo bet pellgarget Firefox e brezhoneg adalek al lec'hienn-se. A-bouez eo din kinnig un droidigezh prop evitañ...

Philippe
Giulia
Messages : 66
Inscription : sam. août 20, 2005 3:26 pm
Localisation : Aubervilliers, 'kichen Pariz
Contact :

Message par Giulia »

Evit "arveriad/implijer": ne blij ket din arveriad, peogwir ne vo ket komprenet d'am sonj, ha ne blij ket din "implijer", peogwir evidon me eo an implijer an hini a bae an implijad... met da zibab, e kemeran implijer peogwir e vez komprenet aes.
Avatar de l’utilisateur
Alan Monfort
Messages : 63
Inscription : lun. mars 06, 2006 2:00 pm

Message par Alan Monfort »

Savet eo bet ar respont-mañ er gêr rak ne'm eus ket internet ha ret eo din mont d'un vediaoueg. Gwelout a ran ez eus bet traoù lavaret abaoe.
Alan

Fulup J. ker,

Fazioù a chom ha trugarez da adlenn ha menegiñ ar vioù koukoug pe ar fazioù all a chom.

Doare pe stumm, dibabit ho kamp !
Me a ra gant (ya, "ober gant" a arveran ivez ;) handelv. Kinniget eo bet e 1995 gant Geriadur ar stlenneg ha Geriadur an armerzh, evit ober un difoc'h etre stumm pe doare. Evit ur gwenedour emañ doere kevatal da "keloù"...
Penaos e vo troet : il existe plusieurs versions de certaines formes géométriques : étoiles à 3, 4, 5 branches, carrés droits ou aux coins arrondis : "stummoù disheñvel eus stummoù mentoniel" sklaer eo.

Hag arabat disoñjal e vez gwelet, peurliesañ, ur ger nemetket war al lañser. Setu perak e vo aesoc'h kaout gerioù disheñvel evit kealioù disheñvel. Ya, gerioù a vo da zeskiñ. Evel ma vefe ret Deskiñ gerioù ar bigi, ar mor, ar plant, al loened...
Abaoe 1995 e ran gant geriadur Preder ha degemer a ran o labour rak n'on ket gopret evit adsevel ent-gashoc'h al labour graet gant tud barrekoc'h egedon.

implijad g. : (1) employé
implijer g. : employeur (celui qui paie)
implijout, employer
implij g. emploi

Mollad zo "module".
Plug a dalv lugell, neuze enlugellad n'eo ket faoz, ha komprenet eo bet diouzhtu gant Gwenhael Ar Menteg, brezhoneger a-vihanik yaouank, p'en deus gwelet ar ger. Ur plug-in a c'hall bezañ ur mollad, an holl volladoù n'int ket plug-in dre ret.

Ar gerioù diwar-benn ar stlenneg am eus kinniget gant ma levr : Gerioù evit Komz Brezhoneg Bemdez e 2001 ha war ma load (;)) internet [url]http//hizivandeiz.free.fr/[/url]. Kalz tud a ra gant an dafar-mañ.

Pajennad :
Un difoc'h a vez graet etre ar voutailh hag ar voutailhad. E galleg "on boit un verre" e brezhoneg ez ever ur werennad. Ar pezh a vez anvet "ledanvad an endalc'h e-lec'h an endalc'had" (métonymie du contenant pour le contenu), " n'eus ket anezhañ e brezhoneg. Pa soñjer mat, evañ ur werenn a vefe diaes a-walc'h. Heñvel e vo evit ar bajennad, ur pouez roet dezhi ouzhpenn.
E Geriadur ar Stlenneg, pennad 2985 :
* où les pages sont transférées sur demande de l'usager "ma vez treuzdouget ar pajennadoù diwar c'houlenn an arveriad".
* où un ensemble limité de pages est diffusé par un réseau de distribution "ma vez skignet un niver harzek a bajennadoù dre ur rouedad amledañ".

request : requête, demande (Hachette-Oxford)
request : demande, requête (Harraps)
requête n. fém. Demande instante. Une humble requête. À la requête de: sur la demande de. La circulation sera interdite pendant la nuit, à la requête des riverains. Hachette
Geriadur an armerzh : p. 208
requête (jur.) enkouent g. ; (courant) azgoulenn g. ; faire - à qqn pour obtenir qqch azgoulenn udb digant ub ; faire - à qqn (question pressante) azgoulenn ouzh ub.

Ur gudenn wir ez eus gant an niveroù argemmus. Menegiñ a rit 4 deiz zo, 5 deiz zo. Mat, met gwell e vefe bet kregiñ gant 2 Zeiz zo. Dibabet hon eus an droienn-mañ, diampart moarvat, en abeg d'ar c'hemmadurioù. Penaos e vo skrivet 22 Deiz zo ? Mard hoc'h eus ur ginnig d'ober e vo degemeret gant plijadur.

• AD-, AS-, AT-, AZ-, préfixe itératif comme " re- " en français : adober, refaire, adgwelout, revoir ; devant les substantifs peut rendre " supplément de, dépendance de, addition à ; (objet) d'appui, de renfort, supplémentaire; double-, contre- ", etc., et aussi " anti- " dans certains cas : Ad-Liban, Ad-Kaokaz Anti-Liban, Anti-Caucase; az- sert en Léon de diminutif" pour les noms de couleur : azgwenn, blanchâtre, en Trég. arwenn. La langue tend à différencier ad- et az- en attribuant,, à ce dernier un sens plus fort : adpediñ, prier, adgoulenn, demander de nouveau ; azpediñ, azgoulenn, prier et supplier, demander avec instance. Grand dictionnaire français-breton, Frañsez Vallée, p. XXVIII.

Perak hoc'h eus dibabet :
postel g. posteloù e-lec'h postelioù pa vez da 80% eus ar gerioù oc'h echuiñ gant un "L" ul liester e -ioù. Kontet em eus war Geriadur brezhoneg-galleg Roparz Hemon. Perak mont war du an nemedennoù evit ur ger nevez krouet ?

A galon,

Alan Monfort

Da vezañ kendalc'het...
Alan
Avatar de l’utilisateur
Alan Monfort
Messages : 63
Inscription : lun. mars 06, 2006 2:00 pm

Message par Alan Monfort »

Ur gerig ouzhpenn...

N'azasaan ket, treiñ a ran.
C'hoant am eus diskouezh e c'hall bezañ ar brezhoneg ur yezh ken pinvidig, ken spis hag ar re all ha ne fell ket din treiñ troiennoù arbennik gant troiennoù amspis evel :
il a eu des subventions : arc'hant en deus bet.
Troiennoù amspis ne blij ket din.
Mar teufe ar c'hoant din komz e brezhoneg gant ul labourer douar e vefe ret din deskiñ e c'heriaoueg, a-hend all e lavaro atav ar benveg-mañ, ar benveg-se e lec'h ur c'heriaoueg pinvidig.
Ya, marteze ez an pell, re bell e vo lavaret gant tud zo. Da vihanañ e klaskañ sachañ al live an uhelañ posubl.
Evit ar re yaouank, e galleg, n'eo ket ur gudenn gwelout gerioù evel, affichage, version, composants.
Pa vo gwelet meur a wech ar gerioù e chomint er spered.
N'on ket a-du (n'emaon ket a-du) gant Philippe pa skriv eo ret lakaat ar gerioù eeunañ war al lañserioù. Bemdez Doue e vint gwelet, ret eo profitañ, er c'hontrol, evit sankañ ar gerioù e penn an dud.

A galon,

Alan Monfort
Alan
Giulia
Messages : 66
Inscription : sam. août 20, 2005 3:26 pm
Localisation : Aubervilliers, 'kichen Pariz
Contact :

Message par Giulia »

Evit azasaat ha trein:
azasaat ne zalvez ket simplaat... Pa lavaran eo ret azasaat ha n'eo ket trein, eo kentoc'h evit diforc'hian diouzh troidigezh ul levr da skouer. En droidigezh lennegel eo ret chom feal d'an destenn orin. Evi ur meziant, n'eo ket ar memestra (evidon). Ar pal eo lakaat da gompren, ha ne ra forzh ma ne vez implijet ar memes doare da larout eget e saozneg.
E galleg zoken e vez troet traoù 'zo en doare re luziet, ha diaes eo evit un den nann-arbennik kompren a-wechoù.
Hag evit gerioù evel "affichage", e galleg eo ur ger simpl eo a vez implijet, hag henvel e saozneg gant "view"... hag ar memestra eo evit an holl veuziadoù dre vras. Fin, forzh penaos ez eus daou zoare dishenvel da welout an traoù ganeomp. Ma gav kalzig a dud ez it re bell gant live ar gerioù, marteze eo ret en em c'houlenn hag en n'eus ket un tamm wirionez ganto, ha klask ur c'hempouez etre ho sonjoù, hag "implijadusted" ho troidigezhioù.
Pa vo echu ganeomp trein Ubuntu, ma vez rebechet din gant meur a zen eo re amspis ar gerioù implijet ganin, neuze e klaskin uhelaat un tammig al live. Dre m'eo labour an troour ul labour hiniennel, eo diaes a-wechoù gout hag en eo mat pe get ar pezh a reomp. Deomp da deurel pled eus ar pezh vez laret gant an "implijerien" pe arveriz (arveridi pe arveriz?).

Kemm: en ur adlenn ma c'hemennadenn e verzan e c'hell seblantout taer un tamm. Ne oa ket ma c'hoant tamm ebet. Kalz a zoujans m'eus evit al labour bet graet ganeoc'h (hag a sikour ac'hanon kalz evit trein). Kompren a ran ho toare da sonjal a-fed yezh, zoken ma n'eo ket ma hini. Ouzhpenn-se em eus kalz da zeskin c'hoazh, rak kalz fazioù a ran e brezhoneg :?
Fulupig
Messages : 2
Inscription : jeu. avr. 27, 2006 11:57 am

Message par Fulupig »

N'em boa ket gwelet e oa bet lakaet ma fostel war ar forom. Digarezit eta pa n'em boa ket respontet deoc'h. Setu un nebeud elfennoù ouzhpenn da-heul respont A. Monfort.

Evit ur gwenedour emañ doere kevatal da "keloù"...
- Ret eo lakat kemm etre rannyezh ha kenyezh a gav din. an holl yezhoù all a ra gant ur ger pemdez ha liesteriek ivez evit stumm ur meziant : version

Penaos e vo troet : il existe plusieurs versions de certaines formes géométriques : étoiles à 3, 4, 5 branches, carrés droits ou aux coins arrondis : "stummoù disheñvel eus stummoù mentoniel" sklaer eo.
- Evit formes géométriques eo bet degemeret lunioù mentoniel


implijad g. : (1) employé
implijer g. : employeur (celui qui paie)
implijout, employer
implij g. emploi
- Sklaer a-walc'h eo termenadur kentañ ar ger implijer e geriadur an Here, a gav din : Den a ra implij eus un dra bennak.


Pajennad :
Un difoc'h a vez graet etre ar voutailh hag ar voutailhad. E galleg "on boit un verre" e brezhoneg ez ever ur werennad.
- E brezhoneg ec'h ever ur banne kentoc'h hag e prener ur voutailhad dour.

request : requête, demande (Hachette-Oxford)
request : demande, requête (Harraps)
requête n. fém. Demande instante. Une humble requête. À la requête de: sur la demande de. La circulation sera interdite pendant la nuit, à la requête des riverains. Hachette
Geriadur an armerzh : p. 208
requête (jur.) enkouent g. ; (courant) azgoulenn g. ; faire - à qqn pour obtenir qqch azgoulenn udb digant ub ; faire - à qqn (question pressante) azgoulenn ouzh ub.
- Kalz kreñvoc'h eo "azgoulenn" eget "request" amañ. Request ne dalvez nemet goulenn graet a-benn kaout ur respont. Sellit ouzh geriadur an Here; azgoulenn : goulenn en un doare uvel ha dalc'hus

Ur gudenn wir ez eus gant an niveroù argemmus. Menegiñ a rit 4 deiz zo, 5 deiz zo. Mat, met gwell e vefe bet kregiñ gant 2 Zeiz zo. Dibabet hon eus an droienn-mañ, diampart moarvat, en abeg d'ar c'hemmadurioù. Penaos e vo skrivet 22 Deiz zo ? Mard hoc'h eus ur ginnig d'ober e vo degemeret gant plijadur.
- 22 deiz zo a vez skrivet ent reizh ha lavaret e vez 2 zeiz warn-ugent zo.
- Ma'z eus ur gudenn kinnig ar sifroù amañ, n'eo ket direizh skrivañ 2 deiz zo.
Fulupig
Messages : 2
Inscription : jeu. avr. 27, 2006 11:57 am

Treiñ

Message par Fulupig »

"N'azasaan ket, treiñ a ran" eme alan Monfort. Nec'het on gant ar pezh a lennan amañ rak micher an troer zo azasaat just a-walc'h. Treiñ zo azasaat dre natur. Treiñ n'eo ket just lakaat en ur yezh nevez gerioù ur yezh all. Treiñ zo adtaolenniñ en ur yezh bennak, gant spered ar yezh-se, ar mennozhioù bet displeget e penn kentañ en ur yezh all. Se a dalvez treuzfurmiñ an doare ma'z eus bet lavaret un dra bennak evit e lavaret en-dro e-giz pa vije bet eztaolet war-eeun er yezh nevez. Kement-se ne dalvez ket dre ret istreiñ. Etre treuzplakañ ar yezh orin ha disleberiñ ar pezh zo bet lavaret en ur istreiñ, emañ hent strizh an troer a zle klask adteuler en ur yezh yac'h spered ar pezh zo bet displeget er yezh kentañ.

Fulup
Giulia
Messages : 66
Inscription : sam. août 20, 2005 3:26 pm
Localisation : Aubervilliers, 'kichen Pariz
Contact :

Message par Giulia »

A-du a-walc'h 'maon gant ar pezh eo bet skrivet a-us.
Ha karout 'rafen goût petra eo ho soñj deoc'h holl a-fed ar c'hinnig m'eus graet: sevel ul lizher-skignañ evit strollañ ar strivoù treiñ, klask en em glevout war ar c'heriaoueg ar muiañ posubl, ha klask ijinañ asmablez troiennoù nevez evit traoù 'zo.
vindotale
Messages : 3
Inscription : mer. mai 17, 2006 6:29 pm

Message par vindotale »

demat d'an holl.
lakaet 'm eus ma anv àr ar forum-mañ evit kemer perzh er gomz kroget genoc'h a-zivout ar stlenneg e brezhoneg. Tro m eus bet da lenn an holl evezhiadennoù graet get an holl ac'hanoc'h a-zivout ar c'heriaoueg bet implijet evit lakaat mozilla e brezhoneg. Daet zo bet soñj din neuze pellgargiñ ar meiziant-se evit sellet a-dostoc'h. Na bout n'on ket duac'h doc'h geriaoueg ar stlenneg e e c'hellan lâret eh eus gerioù ne'm behe ket troet er mod mand int bet troet ha lod-kaer anezhe m'eus komprenet mat hag un nebeut 'm eus kavet luziet erwalc'h. Met da ma soñj n'eo ket aze ema an dalc'h. Al labour hollek m eus gwelet ha mat m eus-eñ kavet. N'on ket chomet da vouzhiñ a-gaoz ma oa un nebeut gerioù luziet a-barzh. A-fet an tabut a-ziàr implij enlugellad pe adveziant : sklaeroc'h e oa din an droienn enlugellad (piv n'anava ket ar ger lugell ?) Met ne vern ur wezh oc'hpenn n'eo ket ar munudoù a gavan ar pouezusañ. ha perak e vez bepred klasket laret ar soñj diàr ar munudoù e-raok laret ar soñj àr ul labour a-vras ?

Oc'hpenn-tra ma vez en em risklet àr hent ar "pismigiñ" e vez kavet bepred tud evit dislaret ar pezh a vez tud arall é soñjal. afer "a-du on" da skouer :
gallekadur ? neuze ne ouie ket brezhoneg flour Añjela Duval (oberennoù klok Añjela duval p.395) "pa roe da ditl da unan ag he barzhonegoù "me n'on ket a-du". Ar brezhoneg n'eo ket ur yezh akademikel neuze eh eus kement a reolennoù evel ha nemedennoù pe c'hoazh evel a vrezhonegourion é tremen hebiou dezhe. Da biv eo e gwenedek a zo a-enep ar reolenn (goude ur renadenn dra amstrizh COI e ranker kavouet ar stumm ema ag ar verb bout) newazh e vez laret da biv eo. Ha c'hoazh get an niverus m'ema an isrannyezhel a gaver e gwenedeg ma n'heller ket bout sur e vez implijet ar stumm enep-yezhadurel-se e pep lec'h. Ar brezhoneg n'eo ket ur skiant peurvat. laoskamp pep unan neuze da ober hervez e soñj ha taolamp ur sell a-vras àr an traoù a vez graet e-lec'h kemer hent arvarus ar pismigiñ.

Diwezhañ tra evit henoazh : Ma ta soñj d'ur brezhonegour bennak pellgargiñ meiziantoù e brezhoneg e talv ema mennet d'en ober. Engortoz eo a daliñ doc'h diaesamantoù-yezh. A-vihanoc'h ne dahe ket soñj dezhoñ er pellgargiñ.

Oc'hpenn-se daoust m'ema sklaeroc'h adveziant evit enlugellad evit kement unan n'eo ket akourset doc'h geriaoueg ar stlenneg ?
ma soñj eo. Petra soñjit anezhoñ ?
A galon genoc'h
Vindotale
vindotale
Messages : 3
Inscription : mer. mai 17, 2006 6:29 pm

Message par vindotale »

man digarezit un nebeut frazennoù n'int ket splann a-gaoz ma m eus ankouezhet skriviñ gerioù zo.
da vout kendalc'het.

un erratum a gasin deoc'h benn arc'hoazh
Répondre